الديسلكسيا أو عُسر القراءة واحد من اضطرابات التعلم، لأن اللي بيعاني منه بيبقى عنده مشاكل في التعرف على أصوات الكلام ومعرفة مدى صلتها بالحروف والكلمات (تفكيك رموزها). وبيحصل بسبب فروق فردية في مناطق الدماغ المسؤولة عن معالجة اللغة. كمان في الغالب الموضوع متوارث، وفيه أبحاث ربطت بينه وبين جينات معينة بتؤثر على كيفية معالجة المخ للقراءة واللغة.
عُسر القراءة مالوش علاقة بالذكاء أو السمع أو البصر. وغالبية الأطفال المصابين بيه ناجحين في دراستهم خصوصًا لو بيدروسوا من خلال برامج تعليمية خاصة، ده غير طبعًا أن الدعم المعنوي مهم قوي في تحسين أداء المصاب بيه.عُسر القراءة مالوش علاج، لكن الاكتشاف المبكر ممكن يساعد جدًا في التحكم فيه. كمان وارد أنك متكتشفوش بدري، لكن ممكن تتعامل معاه في أي مرحلة.
أعراض الديسلكسيا أو عُسر القراءة:
قبل الدراسة
- التأخر في الكلام
- تعلّم الكلمات الجديدة ببطء
- مشاكل في تكوين الكلمات بشكل صحيح، زي عكس ترتيب الأصوات في الكلمات أو الخلط بين الكلمات المتشابهة
- مشاكل في تذكر الحروف والأرقام والألوان أو تسميتها
- صعوبة في تعلّم أغاني الأطفال
وقت الدراسة
غالبًا الأعراض دي بتظهر لما الطفل يبدأ يروح المدرسة:- القدرة على القراءة أقل من عمر الطفل
- قدرته على حل المشاكل أو فهم اللي بيسمعه.
- مبيبقاش قادر على التعبير بالكلمات الصحيحة في بعض الأوقات
- مبيعرفش يكون إجابات الأسئلة
- صعوبة في تذكر التسلسل.
- صعوبة في رؤية (وأوقات في سماع) أوجه التشابه والاختلاف في الحروف والكلمات
- صعوبة في نطق الكلمات غير المألوفة
- صعوبة البلع
- بيقضي وقت أطول في إكمال المهام اللي فيها قراءة و كتابة، وده بيخليه يبعد عنها.
كمان في مرحلة المراهقة:
- بيبقى فيه صعوبة في القراءة بصوت عالي
- بطء في القراءة والكتابة
- مشكلات في التهجي
- صعوبة في تلخيص القصص
- صعوبة في تعلم لغة تانية
- صعوبة في حل مسائل الرياضيات اللفظية
طبعًا الديسلكسيا أو عُسر القراءة بيصاحبها لمضاعفات:
- صعوبة في التعلم.
- مشاكل اجتماعية، خاصة بالتواصل وممكن تؤثر على تفاعله وعلاقاته على المدى الطويل
- عدم الوصول للمستوى في كل مرحلة عمرية.
- فرصة الإصابة بالـ ADHD أعلى، بل والعكس، يعني ممكن المصاب بـ ADHD يصاب بعسر القراءة.
العلاج أو خلينا نقول التحكم في الحالة دي، بيعتمد بشكل أساسي على البرنامج التعليمي والدعم النفسي. وفيه تقنيات علمية مصممة مخصوص للتعامل مع عسر القراءة أو الديسلكسيا.
لو اللي بيقرا الكلام ده أب أو أم، فياريت تبدؤوا معاهم من بدري وبمجرد ما تحسوا أو تشوفوا أي من العلامات والأعراض اللي قولتها، لأن كل ما هتتعاملوا مع الموضوع بدري، كل ما هيبقى فيه تحسن بدري.
كمان القراءة اليومية للطفل بصوت عالي مفيدة جدا، وياريت قريتوا مع تتبع كل كلمة بالصباع، يعني كل كلمة تشاوروا عليها وتقولولها بصوت عالي. وطبعًا الكتب الصوتية حل كويس جدًا.
ومهم قوي تقليل وقت الشاشة جدًا.
لكن الأهم… الصبر والتكرار وعدم إظهار أي ضجر أو زهق، بالعكس، لازم الجلسة دي تكون مريحة وFUN عشان الطفل يبقى مستنيها كل يوم.
بس فيه حاجة… لازم تتأكدوا أن الموضوع مالوش أسباب تانية، زي البصر والسمع أو اضطراب ما في المخ أو الجهاز العصبي، أو حتى مشاكل في سلوك الطفل. عشان تبقوا متأكدين أنكوا شغالين في الطريق الصحيح.
وأخيرًا أرشحلكوا الكتاب ده جدًا
This is Dyslexia: The definitive guide to the untapped power of dyslexic thinking and its vital role in our future Paperback – 7 Oct. 2021
متوفر على أمازون من هنــــــــــا
لو عجبك المحتوى واستفادت منه، تقدر تتابعني على تويتر @_WalidTaha أو تشترك في قناتي على يوتويب أو في النشرة البريدية الجميلة 😎 ميكانيكي بني آدمين.
