✍️الكتابة لتجربة المستخدم أو الـUXWriting من المجالات المطلوبة قوي النهاردة، ومع ذلك معرفتنا بيها قليلة جدًا، عشان محدش عارف أو فاهم بالظبط هي إيه، فأنا هقولك وهرشحلك مصادر تتعلم منها...
يعني إيه الكتابة لتجربة المستخدم أو UX Writing؟
واحد من مجالات الكتابة اللي بيهتم بصياغة وكتابة النصوص اللي بيتعامل ويتفاعل معاها المستخدم في تقريبًا كل حاجة.
بداية من التليفون اللي في إيدك، لغاية النصوص اللي بتشوفها في الـ ATM ولوحة العربية بتاعتك.
يعني نظم تشغيل ماشي، تطبيقات مفيش مشاكل، مواقع يالا بينا، ألعاب وليه لأ... بص... حرفيًا أي حاجة بتستخدمها النهاردة بسهولة فالسهولة دي جاية من فريق كتب نصوص واستخدم أيقونات سهلت عليك الاستخدام.
زي إيه برضه؟! 👇
- النصوص المُصغرة أو الـ Microscopy
- الإرشادات وتعليمات الاستخدام.
- نصوص الأزرار.
- رسائل التأكيد.
- الـ CTA Hأو الدعوة لاتخاذ إجراء.
- الإشعارات والتنبيهات.
وكل حاجة بقى على الوزن ده 👇
وده يفرق إيه عن كتبة المحتوى الإعلاني Copywriting؟
الفرق أنك في التسويق والـ، Copywriting بتكتب عشان تحقق أهداف الشركة اللي زي البيع مثلا، لكن في حالة الكتابة لتجربة المستخدم فأنت بتكتب للمستخدم...
عشان حاسس بيه وعارف اهتمامته.
عشان متعاطف معاه وحاطط نفسك مكانه.
زي مثال كنت سمعته في بودكاست من فترة...
لما بتبقى في المطار بيبقى كل همك تاخد الـboardingpass وتعدي من الجوازات وتخلص. لكن تلاقي بعض الشركات تديلك 20 فلاير فيهم معلومات متهمكش خالص في اللحظة دي، لأن كل اللي أنت عايزه أنك تعرف بوابة كام، ومش مهتم بالأميال والبتاع.
طبعا الموضوع مش بالبساطة دي خالص، لأن اختيار غلط لكلمة أو جملة، ممكن جدا يكلفك البزنس بتاعك.
لذلك عملت حلقة كاملة عن الموضوع هتلاقيها في التويت الجاية، وفي التويت اللي بعدها هرشحلك المكان العربي الوحيد اللي هيخليك من طلائع الالمجال ده في المنطقة. 👇
ما هي الكتابة لتجربة المستخدم UX WRITING | واحد من أهم مجالات الكتابة في 2022
كمان منصة UX Writing بالعربية، هي أفضل مكان ممكن تتعلم منه.
ومش بس من الكورسات المدفوعة، لكن بالنسبة لي ... الحساب على تويتر والمدونة بتاعتهم، فيهم محتوى قوي جدا وهينفع أي حد بيبدا
ده حسابهم @UXWritingar
*أنا ما أخدتش أي من كورساتهم، لكن آراء الناس على الموقع عظيمة جدا
لو عجبك المحتوى واستفادت منه، تقدر تتابعني على تويتر @_WalidTaha أو تشترك في قناتي على يوتويب أو في النشرة البريدية الجميلة 😎 ميكانيكي بني آدمين.
