⚡️أستنى متجريش… عايزك تقرا الكلمتين دول للأخر⚡️

دخلت في مناقشة مع حد امبارح ومكنتش مصدق رفضه التام لتعلم الإنجليزي لأنه شايف أنه مش محتاجه طالما عايش في بلده ومش هيخرج منها، ومش شايف إزاي هيستفيد منه. ومع كلامه حسيت أننا فجأة قاعدين في خيمة في صحرا منعزلة وأقرب خيمة مننا محتاجة يومين مشي عشان نقولهم معندكوش بصلتين؟

تعلم اللغات ليه أهمية كبيرة قوي منم زمان جدا ومش من الأيام دي بس، زي ما بيتوهم بعض السطحيين اللي بيقولوا “تعلم اللغة منظرة”، لكنه مهم في زيادة مصادر المعرفة اللي “أصولها” مش متاحة بلغتك الأم، ده غير أنها بتشغل دماغك الجميلة دي عشان تحكم على الأمور بشكل أحسن والقفل يفك شوية وتقدر تتعلم أفضل، وده لأن تعلم اللغة زي ما قولت في كذا فيديو من سلسلة The Right Way To Say على قناة Walid Taha بيطور “المخ” وبيحسن أداء خلاياه، وده بينعكس على الذاكرة وطريقة التفكير.

تعلم اللغة هيخليك تتعامل مع تكنولوجيا النهاردة بشكل أفضل، وهيرفع فرصك في السفر والهجرة أو على الأقل الشغل مع شركات مبتكتبش على الموظفين شيكات عشان يشتغلوا عندهم، وبدل ما شغلك يكون محلي بملاليم، ممكن جدا توفرلك فرص أفضل بدخل أكبر.