مفيش حاجة ممكن تحل مكان البني آدم!

 

 مفيش حاجة ممكن تحل مكان البني آدم!

جملة بتتقال من أول ظهور الآلة في العموم، ومع ذلك الآلة تطورت من وقت ظهورها لغاية النهاردة بشكل مخيف وسريع جدًا… وفعلا أخذت مكان البني آدم وقللت العمالة.

أنت عارف أن الفرق بين The Wright brothers ورحلة Apollo 11 اللي بعتت أول بني آدم للقمر… 66 سنة بس؟

مش عايزك تقع في حفرة العنجهية والإنكار اللي منتشرة قوي الأيام دي في صورة بوستات بتتكلم عن “استحالة” أن الذكاء الاصطناعي هياخد مكانك في شغلك، وخصوصا في المجالات الإبداعية، لأن في الحقيقة ده هيحصل وببحصل بالفعل… طبعا مش على نطاق واسع ولكن بيحصل وبيتجرب كل يوم وبيتطور “بالساعة”.

اللي بيروج للكلام ده ما بين واحد مشهور بيبيع كورسات وواحد هتيف ليه وواحد تالت هو جاي جاهز بالـ denial بتاعه؛ والتلاتة لو أقنعوك بكلامهم، مش هتلاقي شغل بعد ٥ سنين أو ١٠ بالكتير.

فيه دلوقتي أنظمة ذكاء اصطناعي للكتابة، من أول الـ copywriting لغاية الـ creative writing يعني قصص وكتب وكده، وحتى الأبحاث والتقارير المالية.

اللي هو فيه منصات بتدخل تقول للنظام انا عايز أعمل كتاب عن إتنين ماشيين في الشارع وقابلوا أسد والأسد ده طلع ابن خالتهم وجايلهم عشان خسر فلوسه وعايز مساعدتهم عشان يحفروا نفق يهرب منه للمريخ، والنظام يكتب.

وفي ناس دلوقتي بيستخدموا الذكاء الاصطناعي كٰـ”مساعد” في كتابة رواياتهم وتقاريرهم.

مش معنى كلامي أنك “لازم” تتعلم AI وتبقى متخصص DL والكلام ده، لو تقدر ماشي فل جدًا جدًا، ولو متقدرش فلازم تبقى متابع للتطور اللي بيحصل، ومتدرب على التعامل مع المنصات الخاصة بمجال شغلك، وتطلع من حفرة الإنكار اللي عامياك عن اللي بيحصل حواليك.

أنا فاكر لما جيبت Oculus الجيل الأول Rift، مكنتش متخيل أن فيه يوم هييجي وهستغنى عن كل. الكابلات دي، لكن دلوقتي فيه Quest 2 وجامدة جدًا وأقوى… وأرخص!!

عايز أقولك أن تجربة مارك للذراع القابلة للإحساس، سبقها أبحاث من زمان قوي، وأن أول تطوير حقيقي ليها كان في 2014، لما باحثين قدروا يعملوا جلد اصطناعي قادر على الاحساس بالضغط والحرارة وحتى لو بيلمس سطح جاف أو غير جاف، وأنا نفسي كتبت تقرير عنها في الوقت ده وهدورلك عليه، ولو مش لاقيه هجيبلك البحث نفسه.

يعني فعلًا وعود مارك بأنك هتحس جوا الميتافيرس حقيقية وممكنة، ولو مش النهاردة فقريب قوي!

متسمعوش لأي دعوات بتشجع على رفض التطور اللي بيحصل، لأنكوا هتسمعوا وتتفذوا، بس التطور هيحصل وهيسيبكوا، ولما تفوقوا هتبقوا محتاجين وقت كبير عشان تلحقوا اللي فاتكوا.

فيه محاسبين أنكروا فكرة أن الكومبيوتر ممكن ياخد مكانهم في يوم من الأيام ورفضوا يتعلموه أو حتى يتعلموا التطبيقات اللي هتساعدهم، ودلوقتي مالهمش مكان، فيه صحفيين قدام رفضوا فكرة الكتابة أونلاين أصلًا، ودلوقتي جرايدهم بتقع وفيه منها وقع وقفل تمامًا.

عمر ما كان تعلم الجديد غلط… الغلط الحقيقي أن دماغك تبقى مقفولة وشايف أن مفيش حاجة تقدر تتفوق على البني آدم أو على الأقل تعمل جزء كبير من شغله، وكل الكلام العاطفي الكبير اللي مالوش اي تلاتين لزمة ده.

ماتبقاش Blackberry

يومك فُل!